বিভাণ্ডক উবাচ:
রক্ষাংসি চৈতানি চরন্তি পুত্র; রূপেণ তেনাদ্ভুতদর্শনেন |
১ ক
বিভাণ্ডক উবাচ:
অতুল্যরূপাণ্যতিঘোরবন্তি; বিঘ্নং সদা তপসশ্চিন্তয়ন্তি ||
১ খ
বিভাণ্ডক উবাচ:
সুরূপরূপাণি চ তানি তাত; প্রলোভয়ন্তে বিবিধৈরুপায়ৈঃ |
২ ক
বিভাণ্ডক উবাচ:
সুখাচ্চ লোকাচ্চ নিপাতয়ন্তি; তান্যুগ্রকর্মাণি মুনীন্বনেষু ||
২ খ
বিভাণ্ডক উবাচ:
ন তানি সেবেত মুনির্যতাত্মা; সতাং লোকান্প্রার্থয়ানঃ কথঞ্চিৎ |
৩ ক
বিভাণ্ডক উবাচ:
কৃত্বা বিঘ্নং তাপসানাং রমন্তে; পাপাচারাস্তপসস্তান্যপাপ ||
৩ খ
বিভাণ্ডক উবাচ:
অসজ্জনেনাচরিতানি পুত্র; পাপান্যপেয়ানি মধূনি তানি |
৪ ক
বিভাণ্ডক উবাচ:
মাল্যানি চৈতানি ন বৈ মুনীনাং; স্মৃতানি চিত্রোজ্জ্বলগন্ধবন্তি ||
৪ খ
লোমশ উবাচ:
রক্ষাংসি তানীতি নিবার্য পুত্রং; বিভাণ্ডকস্তাং মৃগয়াং বভূব |
৫ ক
লোমশ উবাচ:
নাসাদয়ামাস যদা ত্র্যহেণ; তদা স পর্যাববৃতেঽঽশ্রমায় ||
৫ খ
লোমশ উবাচ:
যদা পুনঃ কাশ্যপো বৈ জগাম; ফলান্যাহর্তুং বিধিনা শ্রামণেন |
৬ ক
লোমশ উবাচ:
তদা পুনর্লোভয়িতুং জগাম; সা বেশয়োষা মুনিমৃশ্যশৃঙ্গম্ ||
৬ খ
লোমশ উবাচ:
দৃষ্ট্বৈব তামৃশ্যশৃঙ্গঃ প্রহৃষ্টঃ; সম্ভ্রান্তরূপোঽভ্যপতত্তদানীম্ |
৭ ক
লোমশ উবাচ:
প্রোবাচ চৈনাং ভবতোঽঽশ্রমায়; গচ্ছাব যাবন্ন পিতা মমৈতি ||
৭ খ
লোমশ উবাচ:
ততো রাজন্কাশ্যপস্যৈকপুত্রং; প্রবেশ্য যোগেন বিমুচ্য নাবম্ |
৮ ক
লোমশ উবাচ:
প্রলোভয়ন্ত্যো বিবিধৈরুপায়ৈ; রাজগ্মুরঙ্গাধিপতেঃ সমীপম্ ||
৮ খ
লোমশ উবাচ:
সংস্থাপ্য তামাশ্রমদর্শনে তু; সন্তারিতাং নাবমতীব শুভ্রাম্ |
৯ ক
লোমশ উবাচ:
তীরাদুপাদায় তথৈব চক্রে; রাজাশ্রমং নাম বনং বিচিত্রম্ ||
৯ খ
লোমশ উবাচ:
অন্তঃপুরে তং তু নিবেশ্য রাজা; বিভাণ্ডকস্যাত্মজমেকপুত্রম্ |
১০ ক
লোমশ উবাচ:
দদর্শ দেবং সহসা প্রবৃষ্ট; মাপূর্যমাণং চ জগজ্জলেন ||
১০ খ
লোমশ উবাচ:
স লোমপাদঃ পরিপূর্ণকামঃ; সুতাং দদাবৃশ্যশৃঙ্গায় শান্তাম্ |
১১ ক
লোমশ উবাচ:
ক্রোধপ্রতীকারকরং চ চক্রে; গোভিশ্চ মার্গেষ্বভিকর্ষণং চ ||
১১ খ
লোমশ উবাচ:
বিভাণ্ডকস্যাব্রজতঃ স রাজা; পশূন্প্রভূতান্পশুপাংশ্চ বীরান্ |
১২ ক
লোমশ উবাচ:
সমাদিশৎপুত্রগৃদ্ধী মহর্ষি; র্বিভাণ্ডকঃ পরিপৃচ্ছেদ্যদা বঃ ||
১২ খ
লোমশ উবাচ:
স বক্তব্যঃ প্রাঞ্জলিভির্ভবদ্ভিঃ; পুত্রস্য তে পশবঃ কর্ষণং চ |
১৩ ক
লোমশ উবাচ:
কিং তে প্রিয়ং বৈ ক্রিয়তাং মহর্ষে; দাসাঃ স্ম সর্বে তব বাচি বদ্ধাঃ ||
১৩ খ
লোমশ উবাচ:
অথোপায়াৎস মুনিশ্চণ্ডকোপঃ; স্বমাশ্রমং মূলফলানি গৃহ্য |
১৪ ক
লোমশ উবাচ:
অন্বেষমাণশ্চ ন তত্র পুত্রং; দদর্শ চুক্রোধ ততো ভৃশং সঃ ||
১৪ খ
লোমশ উবাচ:
ততঃ স কোপেন বিদীর্যমাণ; আশঙ্কমানো নৃপতের্বিধানম্ |
১৫ ক
লোমশ উবাচ:
জগাম চম্পাং প্রদিধক্ষমাণ; স্তমঙ্গরাজং বিষয়ং চ তস্য ||
১৫ খ
লোমশ উবাচ:
স বৈ শ্রান্তঃ ক্ষুধিতঃ কাশ্যপস্তা; ন্ঘোষান্সমাসাদিতবান্সমৃদ্ধান্ |
১৬ ক
লোমশ উবাচ:
গোপৈশ্চ তৈর্বিধিবৎপূজ্যমানো; রাজেব তাং রাত্রিমুবাস তত্র ||
১৬ খ
লোমশ উবাচ:
সম্প্রাপ্য সৎকারমতীব তেভ্যঃ; প্রোবাচ কস্য প্রথিতাঃ স্থ সৌম্যাঃ |
১৭ ক
লোমশ উবাচ:
ঊচুস্ততস্তেঽভ্যুপগম্য সর্বে; ধনং তবেদং বিহিতং সুতস্য ||
১৭ খ
লোমশ উবাচ:
দেশে তু দেশে তু স পূজ্যমান; স্তাংশ্চৈব শৃণ্বন্মধুরান্প্রলাপান্ |
১৮ ক
লোমশ উবাচ:
প্রশান্তভূয়িষ্ঠরজাঃ প্রহৃষ্টঃ; সমাসসাদাঙ্গপতিং পুরস্থম্ ||
১৮ খ
লোমশ উবাচ:
সম্পূজিতস্তেন নরর্ষভেণ; দদর্শ পুত্রং দিবি দেবং যথেন্দ্রম্ |
১৯ ক
লোমশ উবাচ:
শান্তাং স্নুষাং চৈব দদর্শ তত্র; সৌদামিনীমুচ্চরন্তীং যথৈব ||
১৯ খ
লোমশ উবাচ:
গ্রামাংশ্চ ঘোষাংশ্চ সুতং চ দৃষ্ট্বা; শান্তাং চ শান্তোঽস্য পরঃ স কোপঃ |
২০ ক
লোমশ উবাচ:
চকার তস্মৈ পরমং প্রসাদং; বিভাণ্ডকো ভূমিপতের্নরেন্দ্র ||
২০ খ
লোমশ উবাচ:
স তত্র নিক্ষিপ্য সুতং মহর্ষি; রুবাচ সূর্যাগ্নিসমপ্রভাবম্ |
২১ ক
লোমশ উবাচ:
জাতে পুত্রে বনমেবাব্রজেথা; রাজ্ঞঃ প্রিয়াণ্যস্য সর্বাণি কৃত্বা ||
২১ খ
লোমশ উবাচ:
স তদ্বচঃ কৃতবানৃশ্যশৃঙ্গো; যয়ৌ চ যত্রাস্য পিতা বভূব |
২২ ক
লোমশ উবাচ:
শান্তা চৈনং পর্যচরদ্যথাব; ৎখে রোহিণী সোমমিবানুকূলা ||
২২ খ
লোমশ উবাচ:
অরুন্ধতী বা সুভগা বসিষ্ঠং; লোপামুদ্রা বাপি যথা হ্যগস্ত্যম্ |
২৩ ক
লোমশ উবাচ:
নলস্য বা দময়ন্তী যথাভূ; দ্যথা শচী বজ্রধরস্য চৈব ||
২৩ খ
লোমশ উবাচ:
নাডায়নী চেন্দ্রসেনা যথৈব; বশ্যা নিত্যং মুদ্গলস্যাজমীঢ |
২৪ ক
লোমশ উবাচ:
তথা শান্তা ঋশ্যশৃঙ্গং বনস্থং; প্রীত্যা যুক্তা পর্যচরন্নরেন্দ্র ||
২৪ খ
লোমশ উবাচ:
তস্যাশ্রমঃ পুণ্য এষো বিভাতি; মহাহ্রদং শোভয়ন্পুণ্যকীর্তেঃ |
২৫ ক
লোমশ উবাচ:
অত্র স্নাতঃ কৃতকৃত্যো বিশুদ্ধ; স্তীর্থান্যন্যান্যনুসংয়াহি রাজন্ ||
২৫ খ